a 1:Acts 19.29; Rom 16.23; 1 Cor 1.14

John di bura regode

Ago di ini adina

Mina bi John di bura regode. Ina yaku dubu ourefeidena amiye yokoi roka Gaius rofu mina bura reyo. John yaku Gaius rofu ada ago niyo adina ina yaku ekalesia vene be aedesi ni mama reyo amiye roka Diotrephes rofu.

Beika sina ideriAgo di ini adina1–4Gaius di roka moi odoro rena5–8Diotrephes di vegu no9–10Demetrius di vegu buni11–12Metona ago13–15

3 John

1 Mina bura bi dubu di ourefeidena amiye rofu. ^a

Gaius kaere sina rama nufa nai mokei vava reida amiye mina fefa ya rofu bura reida.

2 Nai mokei vava reida amiye, Sei rofu usa nida beika vegu tau reisa mina yaku buni moi vata riyainedi. Ma usa ka nida, yi rovaita di vegu tau noibanu buni niyainedi. Adina na diba yi vima bi buni amedo. 3 Ekalesia usika ourena be yaku baisi na niyadi, ya bi vegu rama reisa amiye. Ada toragade iniye reyaka bi sina rama dudu nana reisa dada. 4 Beika vegu yokoi yaku de na moi ada redo idu neideda bi nai midamida bi sina rama rega amededi.

Gaius di roka moi odoro rena

5 Nai mokei vava reida amiye, ya yaku yi ekalesia usika ourena aedega ameisa bi, moimai buni iniye reisa mini. Yi vegu bi buni iniye adina ina vene bi amiye idana. 6 Ina vene yaku minari amededi ekalesia vene bi sena ni oteimaradi, ya yaku ina vene uka maga aedeisa mina. Ye, buni bi ina vene aedesi ni feidegiya ma dibo regedi mina yaku Sei moi ada rego. 7 Keriso di roka dada ini rautu fereyadi. Ini makai dibo reyadi bi ekalesia de vene rofu aedena buni yokoi be de moiyadi. 8 Una ekalesia vene yaku bi mina kana vene aedegifa bi buni, ye una yaku ina vene nufa sina rama di vakoi moimai renadi.

Diotrephes ma Demetrius

9 Fefa tumu yokoi ekalesia vene rofu sena bura reyaka idu, Diotrephes kaere iniye nigi ina bi ourefeidena amiye vo nido, yaku nai sina bi neidena de redo. 10 Mina dada ya vene rofu baigida ri bi ini vegu ma fufuta ago una rofu nido mina moi ogau regida! Mina maka de idu, ekalesia usika ourena okidedi ka de moido. Ma kaere yaku ina vene moigi rededi ka duburi gutu moi etagae regi redo!

11 Nai mokei vava reida amiye, vegu no mina tari ga re. Vegu buni mina maka tari re. Kaere vegu buni redo amiye bi Sei di. Kaere amiye yaku vegu no redo bi Sei de veyo.

12 Amiye tau yaku nidedi Demetrius bi vegu buni redo amiye ma Sei di ini sina rama yaku ka makai nido. Una ka Demetrius nigika bi amiye buni vo nisifa, ma ya ya diba una yaku beika nisifa bi rama.

Metona ago

13 Ya vene rofu sina bi taugade bura risi ya nigida idu, fefari bura rina bi ura de reida. 14 Agiya aineka na oto ya rofu bae negida mamo vakoi gogo sinasina nigifa.

15 Uka amuta ya sa ameibiyaine.

Yi asiyaka minari ka ini yuata ya rofu ni feidededi. Uni asiyaka mironari amededi ka uni yuata nifa.